- A actividade tivo lugar o pasado venres 22 de abril no Hotel Meiga do Mar de Caldebarcos (Carnota), unha das iniciativas empresariais que contaron coa axuda do GALP
- Durante a sesión da tarde, as e os asistentes visitaron catro proxectos financiados polo GALP no Concello de Carnota
- Están programados catro parladoiros máis no resto de territorios promotores nos vindeiros meses de maio e xuño
Carnota, 25 de abril de 2022.- O proxecto Bitácoras é unha proposta de colaboración entre os Grupos de Acción Local do Sector Pesqueiro de Galicia, que pon en valor a interacción entre grupos, anota o traballo desenvolto ao abeiro do Fondo Europeo Marítimo e de Pesca no período 2014-2020, e afonda na gobernanza das zonas costeiras, apoiándonos nun enfoque metodolóxico do DLP (Desenvolvemento Local Participativo). Participan del o GALP Golfo Ártabro Norte, GALP Golfo Ártabro Sur, GALP Costa Sostible, GALP Ría de Arousa e GALP Ría de Pontevedra.
Os Parladoiros
Dentro das actividades previstas na grella do proxecto atopamos os Parladoiros, xornadas de reflexión conxunta que queren poñen en común experiencias de referencia no territorio en distintos eixos temáticos que van do desenvolvemento sostible das zonas costeiras, ata a innovación e o consumo no sector, pasando por cuestións vencelladas á identidade dos territorios costeiros, os retos da economía azul e o pacto verde na costa galega ou a gobernanza nos territorios do litoral.
Costa Sostible: desenvolvemento sostible das zonas costeiras
A Costa Sostible inaugurou a primeira destas actividades das Bitácoras, que se celebrou o pasado venres 22 de abril no Hotel Meiga do Mar de Caldebarcos (Carnota). A xornada versou sobre Desenvolvemento Sostible das zonas costeiras de Galicia e a ela asistiron preto de 40 persoas das directivas dos GALP que participan do proxecto e outras persoas vencelladas ao sector pesqueiro e ao programa de axudas no territorio do GALP SEO de Fisterra-Ría de Muros Noia.
Ás 10,30h estaban citadas as e os participantes do Parladoiro do Hotel Meiga do Mar de Caldebarcos, un dos proxectos que acadaron financiamento dentro do programa de axudas do GALP e que valeu de sede do parladoiro. Xa ás 11h deu a benvida á sesión Juan Saborido Rama, alcalde de Carnota, que agradeceu ás asistentes a súa presencia e puxo en contexto o parladoiro nos marco das actuacións vencelladas ao sector pesqueiro no municipio.
Proseguiu Manuela Oviedo -xerente do GALP- cun relatorio sobre o papel do grupo na zona costeira e unha reflexión das leccións aprendidas do programa 2014-2020 do Fondo Europeo Marítimo e de Pesca. Puxo en valor Manuela os distintos proxectos apoiados polo GALP, dotando dun especial interese nos promovidos no Concello de Carnota, ao ser este municipio sede do Parladoiro.
A mesa redonda: desenvolvemento sostible
Contra as 11.30h deu comezo a mesa redonda do Parladoiro, concibida como unha mesa de expertas onde pór en común experiencias de boas prácticas noutros territorios e dotar dun contexto ás persoas asistentes co que reflexionar conxuntamente. No caso da Costa Sostible, a mesa estivo moderada pola asistencia técnica das Bitácoras e contou coa participación de Cristina Cid (alcaldesa de Allariz) e Diego Salgueiro (investigador do Future Oceans Lab do Centro de Investigación Mariña da Universidade de Vigo).
Comezou a súa ponencia Cristina Cid, agradecendo ao grupo o convite de participación e ao seu homólogo en Carnota a hospitalidade. Ao longo da súa intervención, analizou modelos de xestión sostible dos territorios centrándose na súa experiencia no Concello de Allariz, como caso exemplificador dun modelo que acadou ao longo dos últimos anos múltiples recoñecementos como o Premio Europeo de Urbanismo.
Deseguido arrancou o seu relatorio Diego Salgueiro que, ao longo da súa intervención puxo o foco na adaptación e resiliencia da actividade pesqueira para a preservación e sostibilidade das nosas rías e mares.
As e os asistentes puideron compartir con estes dous perfís expertos e coa moderación da asistencia técnica as súas inquedanzas, reflexións e comentarios no relativo ao desenvolvemento sostible do territorio e os pasos a dar de cara ao novo programa do Fondo.
O documental das Bitácoras
Ao rematar a mesa, proxectouse o documental das Bitácoras no territorio do SEO de Fisterra-Ría de Muros Noia que xa pode visualizarse aquí. A peza repasa o traballo desenvolto polo GALP no territorio da Costa Sostible, centrándose nos proxectos que se desenvolveron nesta zona co apoio do programa de axudas do Fondo Europeo Marítimo e de Pesca, xestionado polo grupo en colaboración coa Consellería do Mar da Xunta de Galicia.
Como broche final á sesión da mañá, visitouse a exposición da Mostra de Boas Prácticas nos territorios promotores das Bitácoras, onde se recollen as especificidades dos proxectos seleccionados polas xuntas directivas e o público de entre todos os aprobados ao longo do programa 2016-2020.
Sobre as 14h serviuse unha pequena degustación de produto pesqueiro da contorna de Carnota que partiu a xornada e abriu un momento máis distendido entre as persoas asistentes dos cinco territorios costeiros que abranguen os GALP participantes.
Visitas a proxectos
Ao rematar, comezou a quenda de tarde da actividade do Parladoiro, onde se realizaron visitas a distintos proxectos que, como dicíamos, contaron con financiamento dentro do programa de axudas 2016-2020 do GALP da Costa Sostible.
Comezou a grella de visitas no propio Hotel Meiga do Mar -sede do Parladoiro- e Mónica Cambeiro, a súa promotora, guiou aos visitantes nas súas instalacións e explicou máis extensamente o proxecto. Ao rematar, saíuse de Caldebarcos en dirección a ao Faro de Lariño. Este segundo proxecto tamén contou co apoio do GALP e foi a súa guía, Virginia,García quen nos falou da proposta deste hotel emblemático da zona, contextualizando tamén o proxecto de cooperación da Ruta dos Faros, onde o GALP ten tamén participación.
Tras rematar en Lariño, o grupo puxo dirección a Mallou, onde puido visitar e coñecer a actividade de Mar da Morosa, unha innovadora peixería-restaurante que contou tamén con axuda do grupo da Costa Sostible para a súa posta en marcha. O persoal contou tamén parte do proxecto Km0-Mar Galaica, promovido polo GALP, no que teñen igualmente participación.
A última parada foi a Confraría de Lira, onde Mariano Lago -o patrón maior- contou ás asistentes do Parladoiro o proxecto Polbo de Lonxa, acompañado de algunhas das traballadoras que fixeron unha demostración da dinámica das labores na nave.
Proposta temática dos vindeiros Parladoiros
Rematou así o primeiros dos Parladoiros deseñados no marco do Proxecto das Bitácoras. A previsión é realizar catro parladoiros máis no resto de territorios participantes: O primeiro deles tratará os retos da costa galega no tocante á economía azul e o Pacto Verde e será na Confraría de Barallobre (Fene) o vindeiro 6 de maio; seguiralle a zona de Arousa, cun relatorio sobre identidade das comunidades costeiras o próximo 12 de maio no Pazo de Vista Real de Vilanova. Continuará a ruta das Bitácoras na Confraría de Portonovo, en Sanxenxo, xa o 10 de xuño cunha sesión sobre o modelo de gobernanza nas zonas costeiras e rematará a proposta na Lonxa da Coruña o 17 de xuño cun Parladoiro que reflexionará sobre o consumo e a innovación do produto pesqueiro galego.
